OSSORAN TEMPON DAOMAI LANGI'

Pandangan Kosmologi Masyarakat Toraja Berdasarkan Analisis Jowa Imre KisJovak

(Jowa Imre Kis-Jovak,1988) 

1.Langi'mo mula-mulanna sola tana. Nagaragai ampunna tana,ampunna lino. Sirampanammi kapa' langi' na tana. Dadimi tau a'pa',iamo tu: disanga Puangdilalundun, disanga Labiu-biu, disanga Indo' Ongon-Ongon, disanga Simbolongpadang.

2.Malemi Simbolongpadang sirampanan kapa' Riba'. Unggaragami kila', unggaragami sanda kadake, sisarakmi langi' na tana. Ma'kornbongammi tu tau tallu, nakua: "Unggaragamo kadake siulu'ta — na mindamoki' ungkambi' tutungan bia'?" Disituru'imi tu Labiu-biu ungkambi' tutungan bia'.

3.Malemi tu Indo' Ongon-Ongon rokko to kengkok, sirampanan kapa' Pong Tulakpadang. Unggaragami lino', usseno padang, unggaragami angin, unggaragami bongi. Malemi Puangdilalundun langngan langi' sirampanan kapa' Gauntikembong, dadimi Pong Bero-Bero.

4.Unggaragami bintoen, unggaragami bulan, unggaragami allo. Iatonna dolona, masiang bangpa — tae' allo, tae' bongi. Sirampanammi kapa' Arrangdibatu na Pong Bero-Bero. Dadimi Puang Matua Dolo disanga Puang Tongkon.

5.Sirampanammi kapa' Puang Tongkon tu Tumba' Paparilangi'. Dadimi Puang Matua, To petiro aluk, dadi Indo' Samadenna, dadi Barrangdilangi'. Malemi tama bulan Indo' Samadenna, male tama allo Barrangdilangi'. Untiromi kuli'na langi' Puang Matua — manippi'pa kuli'na langi' tonna dolona.

6.Iatonna dolona dao langi', piong ba'tan bangpa dipobo'bo', dena' dipomanuk. Dirtunnukmi riti bulaan, die'te'mi kala'siri lambe'. Kombongmi sauan sibarrung, ombo'mi tandasan sikori-kori.Disondokammi sauan sibarrung daomai sepena langi'; ditampami kuli'na langi', disanga Patalabunga.

7.Tiballa'mi rante masangka', tidandanmi buntu malangka'. Ditampa nene'na batu disanga Patalabintin. Ditampami aluk 7 lise'na, 7 pulona, 7 ratu'na, 7 sa'bunna, 7 kotekna, 7 tampangna,7 sariunna.

8.Malemi nene'na sakke untongkonni sumengana lombok. Diembongmi bulaan tasak sola nene' tang karauan. Iamo ditampa nene'na bo'bo', disanga Bumbunganrante, diganti Datu Lamemme'. Ditampami nene'na to lino, Datu Laukku'; nene'na tominaa La'langlangi', diganti Kambunolangi'.

9.Ditampa nene'na to indo', Datu Mengkamma' (Karaeng Ma'loko-loko). Ditampa nene'na to burake, disanga Killi'-Killi'. Nene'na to ma'gandang, disanga Mandaikama. Nene'na kaunan, disanga Pottokalembang, iamo to dipotedong-tedong uma, to dipokarambau tempe'.

10Tae'pa sambo boko'na tonna dolona. Ditampami nene'na sampin, disanga Ungku, Rambutikembong tungka sanganna. Rindingnami, sikasiri' datu, sikatumpu' ampu lembang. Ditampami nene'na serre', disanga Datu Parerung. Ditampami nene'na pangngan, disanga Kaise'.

11.Ditampami nene'na punti, disanga Datu Marorrong; nene'na tallang, disanga Kumirrik; nene'na ao', disanga Ma'buku bulaan; nene'na induk, disanga Monggo; nene'na sendana, disanga Labengnga'; nene'na manuk, disanga Lua'kollong; nene'na asu, disanga Buriko'; nene'na bai, disanga Riwati; nene'na tedong, disanga Manturiri; nene'na ipo, disanga Datu Merrante, Allotiranda tungka sanganna; nene'na bassi, disanga Riako'.

12.Malemi nene'na sendana ma'rampanan kapa' rekke tampona limbong, sirampanan kapa' Sendana Balo'. Tang sandami rampanan kapa', iami sirampanan kapa' te anakna sauan sibarrung; untumangmi Datu Laukku' bomboan. Nakande solanami manuk, katotok-totok lako sangserekanna, disangami Puang Maro.

13.Urnbaliangammi batu ba'tangna Puangdilalundun, nakua: "Ba'tu la manannang tana' siai ungkambi' tutungan bia' siulu'ku?" Dilando lalannimi Labiu-biu sola Adang Mangkakalena"'. Kendekmi Labiu-biu patutungan bia', ba'tan bangpa tu naposuru' sola dena'.

14.(Paami Datu Laukku', dibura' passakke deata, nakua: "Misami pulu'-pulu' pare,misa simanui tedong.Paami sanda mairi',naarrang tutungan bia'."Susinta to lino, ke denni salata, naarrangki' tutungan bia' — ko la paa batang dikaleta.

15.Malemi nene'na manuk sirampanan kapa' manukna Pong Pirikallo, londongna Pong Ondouai, manuk dadi lanmai kurin-kurin gallang, ombo' rikusi bulaan. Dadimi tallo' siannanan, bamburang sikaruan. Randukmi petanda masiang, nene'na manuk. Randukmi nene'na bo'bo' umpangidenni pare bu'tu ri Tombang, pare to manglaa tedong.

16.Randukmi nene'na manuk dinaran lolokna banni' rekke ulunna langi'. Randukmi diborong-boronganni nene'na manuk: lotong: kambi'na rampanan kapa'; karurung: diposuru' kale; koro: kambi'na lemba kalando; rame: kambi'na sakke malino; lette' riri: kambi'na tallu bulinna; seppaga: kambi'na alang dibando;

17.burï: kambi'na ma'belo tadi; buri'tik: kambi'na tengko randuk; uranuran: kambi'na kombong masirri (induk); bu'ku': kambi'na doko maripi'; bulu tui: kambi'na ma'bala tedong; sa'pang: kambi'na datu matasak; lappung mabusa baba'na: kambi'na raukan tedong; pute: kambi'na tananan bua', ungkambi' lumbaa langi'; bullau: dipopetangka' ura'.

18.Tiborongmi nene'na manuk. Randukmi dipotangkean suru'. Bendanmi suru'na uase to pande sola bingkung to manarang. Malemi tama pangala' tamban Puang Paonoran, nakua: "Kayu apako te?" Nakuami mebali: "Kayu uru, dikombong pandoko dena'." Tae'pa nadisanga banua. Nakuaomi: "Kayu apako te?" Nakuami mebali: "Kayu betau".Napasandami rere'na, napaganna' sanda karua.

19.Napamuntui uase, napamuntui bingkung; apa manokapa ma'lingka. Napatongkonmi dao kalandona buntu, untaan angin ma'kada tau. Ma'kadami tu angin, nakua: "Ma'apako dao kalandona buntu, Puang Paonoran?" Mebali Puang Paonoran, nakua: "Inde kayu betau la kugaraga tau, apa tang ma'ulelean. La kutaanpa tu angin ma'kada tau, kupatamai batang dikalena."

20.Nakuami angin ma'kada tau: "Den manii aluk musala, kumallaimo lan mai batang dikalena, mukuami: Mutoeanna' massangpali' rengnge'." Nakuami Puang Paonoran ma'kada: "Dolo sala, undi mangaku, namakamban kande mammi'na Puang Matua."

21.Nakuami angin ma'kada tau: "La ma'uai ma'tanmo' lan batang dikalena to, la ma'sakke tang tisenggongmo' lan tondon to batangna." Sisulu'mi basse kasalle, angin ma'kada tau na Puang Paonoran, unnindo'mi pandan kabusungan. Moi api sisulu' duka basse Puang Paonoran, nakua: "Pasambiri matako manii lako bangunan banua." Nakuami api: "Aa . . tontongna' diposukaran aluk, ke denni kapemalaran la . . . . "

22.Sirampanammi kapa' anakna sauan sibarrung te kayu betau, sisangami sampu pentallun. Dadimi anakna disanga Pande Patangnga'; unggaragami tandung tiulunna langi'.Dadimi Pande Paliuk, unggaragami bangunan banua. Nene'na tedong male ma'rampanan kapa' disanga Tele'pupu.

23.Malemi Datu Laukku' rekke ulunna langi' sirampanan kapa' Kandomatua, ampona Pong Buatabang, nalolongi kada minnak. Dadi Indo' Pare'- Pare' ungkambi' parekkean para, napotekken battu to. Indo'na Manapa' ungkambi' surasan tallang. Indo' Roatumbang ungkambi' bate manurun.Landosamara ungkambi' raukan tedong.Lua'toding ungkambi' tananan bua'.

24.Randukmi diboronganni tu sendana, naboronganni Pong Mulatau. Sendana balo' ungkambi' surasan tallang. Sendana lumu', ungkambi' tetean tampo. Sendana dongka kumpang rampe matampu'. Sendana lalong umpetajanni kakena bamba sola tarangga masiakSendana sugi' ungkambi' raukan tedong.Sendana bonga malute ditoto parangka dialuk sola patangdo, ke denni tananan bua'.

25.Diboronganni tu nene'na tedong. Sambao': napopendio' talla' to ponto litakan, sulemi sangdunduan pindan. Bulupunte' kambi'na raukan tedong. Kullu kambi'na tananan bua'. Pundulillin kumpang lako rampe matampu'. Todi' sikambi' tana' bassi. Bonga sikambi' tana' bulaan.

26.Kendekmi sangga mairi' daa ulunna langi'. Malemi Pong Mulatau tama tangngana langi', umpokinallo sukaran aluk, sirampanan kapa' Indo' Gori-Gori. Dadimi Manurundilangi'. Umpalumirikmi randanna langi' tangkean suru'. Pariami tangkean suru'. Dadimi sembangan ongan.

27.Bendanmi demmeran para. Paria demmeran para. Dadimi surasan tallang. Bendanmi bate manurun. Bendanmi raukan tedong. Pariami raukan tedong. Bendanmi tananan bua' dao tangngana langi'.

28.Umbungka'mi ba'bana langi' Manurundilangi', ma'banua ditoke', ma'tondok dianginni. Mailu matami rokko tangngana tasik. Nakua: "Diongri loka' la kunii malua' bingkung. Apa iari, ke napatuo ko'to'na' to kapadanganna diong, ke tang situru'na' kuli'na padang."Diroromi buntu malangka', dipatendanmi saruran bulaan. Kombongmi padang di Pongko', ombo'mi padang di Lebukan.

29.Nakuami Manurundilangi': "Den omo te kapadanganna, apa tae'pa tu la kupolalan rokko." Diulingmi eran dilangi', napolalan nene'ta situru' sukaran aluk.Ia nene'na bai madangli' (mataku') unnola eran dilangi', unnola sepenami langi' nene'na bai, tiranduk ilan di Moriu, sirampanan kapa' Torateda', bai bu'tu ri Kanan.

30.Ia nene'na tedong unnola rumassena buntu, tiranduk dio randanna langi', sirampanan kapa' tedongna Indo' Dure'- Dure', tedong mempodongan. Keampo keanakmi tedong, unnorongimi tasik mapulu'; nene'na tedong tiranduk lan di Sinadi. Ia nene'ta Manurundilangi' sirampanan kapa' Marrindiliku; undadiammi tau karua.

31.Misami tang ungkande makula', disanga Ranggauai; iamo disomba tallo'na manuk sola barra' dimamatai.Malemi Saronglea langngan Bone, asu bangpa nasallang. Male Datu Mangoting rokko Palopo, asu dukapa nasallang. Male to tang kumande makula' lako Batuapian. Male Pong Mulapadang lo' Rantebulaan. Male Banggairante tama Siguntu'. Male Pondanpadang tama Lino. Male Pong Tambulibuntu tama Rura.Male Tandiminanga rokko liku.

32.Malingmi tau lo' Siguntu', sandami torro to kampin. Lindomi lindona Patundu' sola Sangga.Nakuami to Sarombon, kadanna to Pasangbayu, to lao' bamba Siguntu':"La ma'patumbamo' inde,la ma'ruang diapamo'? Denmo te aluk kusala sangka' kutengkai kalo',kulamban pasala uma.

33.To malangi' ri bubungan,to tumbang ri papa tallang,bongsu' ri landa banua.To malangi' sao-sao, tumbang salamba-lambana; sao-sao langngan Bone, salamba langngan Balanda. Kenna tang manarang Sangga, kenna tang pande Patundu', ungkita dampinna Bugi', temme' ara'na Balanda." Nakuami to Patundu', kadanna Sanggaiolang: "Ma'dinko mangaku kumba', mangore tanda tinaran, unnaku kande limammu lako to petoe tabang".

34.Nakuami to Patundu': "Tambaimoko to Mambo sola to Pong Beloaak. Ia patutungan bia', patandean sulo-sulo." Rampo ma'rebongan didi, ia mangrampe letokan. Salana pasandak salu — napopa'indo' tama rebongan didi. Salana ma'liu lima lako to petoe tabang, narebongi didi. Sandami nalindo bulanni, pantan nabarre alloi.

35.Sulemi rampanan kapa'. Sulemi mellolo tau. Sulemi doko maripi', rendenan tedong. Sulemi tetean tampo, pesungan banne, nakadang tangkean suru', balo'na tutungan bia'. Sulemi sangga mairi'.

36.Bendanmi bate manurun, dipesung manuk, dipesung bai. Tirandukmi nene' lan lino, tangkean suru' napomatanna lalan, lumepong tondok. Bangunmi ma'tengko randuk.

37.Kendekmi kaise' ma'dandan. Saemi naala anakna to kengkok. Natiromi Marampiopadang tu kaise'na, madarang kebongi, namakamban keallo. Unnindanmi dokena Datu Nakka'.

38.Naraukmi Marampiopadang tu anakna to kengkok. Nadaka'mi Datu Nakka' tu dokena, tae'mo natiro. Ussorongmi rendenan tedong sola tetean tampo sola bulaan tasak, napengkanokai Datu Nakka'. Ma'pasompok sorongmi Datu Nakka'. Malemi Marampiopadang unnala bambalu toding sola ue sitammu bukunna.

39.Randukmi manggaraga buria' Marampiopadang. Nabungkarammi Sampurari mangapi'na tana, ma'tetean ulangmi, ma'pelalan buria' rokko to kengkok. saemi rokko lólokna pao.

40.Narangimi tu gandangna anak to kengkok. Nakuami Marampiopadang: "Mindara dipa'gandangan?" Nakuami to mangkambi' mebali: "Anakna Pong Tulakpadang dirauk dao langi'. Budamo to ma'dampinna natae' namaleke." Nakuami Marampiopadang: "Laoko solanna'." Nakuami tu to mangkambi': "Benna' tu pao mai, kulao ussolangkomi."

41.Saemi lako tondok, ma'kadami tu Marampiopadang, nakua: "Tae'pi aku tau dao banua, kumane ma'dampi." Sae langngan banua, nasapu-sapumi, naalai tu dokena sule. Sulemi kale datunna anak to kengkok, kendek marampa' langngan randanan, urnpotendeng tendengna.

42.Dipokadammi saro tu Marampiopadang. Nakuami: "Samamo' misaroi, ke mipalendu'mi samaanna." Massura' tallangmi; sandami diala tu belona surasan tallang. Natiromi Marampiodang, nakuami ma'kada: "Iamo pole' la saroku: tu belona kapemalaran."

43.Mekutanami, nakua: "Apanna ditanan tu mati' punti?" Nakuami: "Oto'na". Mekutanaomi tu Marampiopadang, nakua: "Na iatu induk?" Nakuami: "Belulukna ditanan." Mekutanaomi tu Marampiopadang, nakua: "Na iatu sendana?" Nakuami: "Tangkena bang ditoto nadiosok. Mekutanaomi, nakua: "Na iatu tallang?" Nakuami: "Oto'na bang ditanan." Mekutanaomi, nakua: "Na apa tu unnoni?" Mebaliomi, nakua: "Gandang".

44.Nakuami Marampiopadang, ma'kada: "Iamo pole' la saroku tu mintu'na tu." Naalami Marampiopadang napatamai buria' tu sarona. Sulemi ma'tetean ulang, untintinmi gandangna. Nakuami to kengkok: "Sae undampi kande limanna." Sitammumi tananan mellao langi', tananan bu'tu ri lino.

45.Napasulemi tu dokena Datu Nakka'. Mamba'tami Marampio padang. Saemi uran. Nasembangi Datu Nakka' tu daunna Marampiopadang. Ma'kadami Marampiopadang lako Datu Nakka', nakua: "Pasuleanna' tu daunku, dokemu nakupasulean dukamoko!" Napasulemi Datu Nakka', apa malayumo.

46.Ussorongmi iananna tu Datu Nakka', nokaomi Marampiopadang. Batang kalenami Datu Nakka' nasorong. Randukmi napotedong-tedong uma Marampiopadang tu Datu Nakka'. To maluangan batu ba'tangna tu Marampiopadang, nasangami anak.

47.Umpala'pa'mi samaanna: ma'parakke para, massura' tallang, merok, ma'bate; pariami; bendanmi tananan bua'. Kendekpa sangga mairï' lan Rura, langnganpa pantan sola nasang. Randukmi sirampanan kapa' Bombongberu' na Mellaolangi', napatudu leko' Pong Marattiatinting, nakua: "Dadimo anakmu baine sia muane, Londongdirura; pasirampananni kapa'."

48.Sengkemi Puang Matua, nakua: "Umbamo papa rara'na tu to misa dikombong, dipasirampanan kapa'?"Apa mandappi'pa langi' sola tana tonna dolona. Nakuami Londongdirura: "Indemo tananan bua' papa rara'na."

49.Nalambi'- mi pangandaran, tallanmi rokko liku to disalampe maniki. Lampungmi Sokko Kalale' sola Indo' Pare'-Pare'. Lampungmi tarukna La'bi Tombeng lako randanna langi'. Karapa natang bendanpa eran dilangi', naola to situang tanduk langngan ba'tangna langi' . . . .

50.Nakuami Puang Matua: "Umbako situang tanduk?" Mebalimi nakua: "Natumangkan kami Pong Marattiatinting." Nakuami Puang Matua: "Ina'pa kusanda malambi'. Lando lalanniko, Suloara' sola Buauran rekke ui'na padang di Sesean. Mupa'sarrinni sanda kadake Pong Marattiatinting sola Pong Marattiabonga.

51.Baai te kalosi kalebu, kalosi sangpiak, kalosi sangtepo, kalosi sangdaluk. Ia la unnissan sampu pissan, sampu penduan. La mutanan tu kalosi. Ianna tuo tu kalebunna pamanda'i lan rampanan kapa' to siulu'. Ianna ia tuo tu sangpiakna, sampu pissan. Ianna ia tuo tu sangtepona, sampu penduan."Pakalan sanglesona manna tuo na sangdalukna.

52.Pakalan rampomi Suloara' sola Buauran patutungan bia'. Rampomi ma'rebongan didi. Malingna Bombongberu' sola Mellaolangi' napopa'indo', tama rebongan didi. Balo'mi tutungan bia'.

53.Sulemi Sokko Kalale' sola Indo' Pare'- Pare' nakadang tutungan bia': Ma'bua'mi Pondanpadang ,la'pa'mi Buntuarroan .Ia bua' dipasarra', samaa ditulu-tulu. Iamo bua' tang damma', samaa tang beluakan. Lao' bambana Lembang, kendekmi sangga mairi', naria tananan bua'.

54.Randuk tumengkami nene', tumengka sola alukna, lao sola bisaranna. Rampo ribamba Marinding, rampo ma'rampanan kapa', lako nene' Buenmanik. Nasalungan kada minnak,naria kada tangguli. Tumampa-mampami rara'. rumende-mende sarapang. Dadi taruk bulaanna.

55.Dadimi Tangdililing, Pasontik, Pong Seppabulaan, Pong Kalolokna sola Pussabannangna.Iamo umbangun banua tu Pong Kalolokna sola Pussabannangna. Namale unnala tedong tama pangala'. Nakuami Beka'-Beka' sola Maradonde': "Saemo ambe'ku umbaa tedong sola banua." Male Pong Seppabulaan unnala bai rokko Moriu, nasanga burana lemba kalando.

56.Napariaimi tangkean suru', natana' sarri', namasirri makamban. Bendanmi sembangan ongan dialami ampo anakna susu ma'dandan, tang tirambanmi sangserekanna. Pariami sembangan ongan.

57.Bendanmi surasan tallang. Paria surasan tallang. Bendanmi raukan tedong. Bendanmi bate manurun. Paria bate manurun. Bendanmi tananan bua' lo' padang di Marinding.

(naosso' Ne' Mani', to minaa daomai Sereale)
H. VAN DER VEEN